Gipanghinaut sa Kagamhanang Probinsyal, ubos sa Yap-Relampagos administrasyon, nga pagasugdan na ang implementasyon sa programa nga Free Medical Assistance para sa mga Bol-anong Senior Citizens sulod sa buwan sa Marso, 2022.

Ang maong programa nagtumong sa paghatag sa libreng oral maintenance nga tambal para sa diabetes, hypertension ug arthritis, mga sakit nga kasagarang gimulo sa mga senior citizens. Gawas niini, makatagamtam usab sila sa libre nga konsultasyon medikal, libreng batakang serbisyo sa laboratoryo (basic laboratory services) sama sa ‘random sugar count ug ‘complete blood count’, sa bisan asa nga mga ospital ug pasilidad nga medikal nga gipanag-iyahan ug gidumala sa probinsya. Libre usab ang pag-isyu sa mga medical certificate kung gikinahanglan.

PAG-ATIMAN SA MGA SENIOR CITIZENS. Gipadayag ni Gob. Art Yap ug Bise Gob. Rene
Relampagos ang paghatag bili sa mga edaran sa paghatag og libreng tambal ug uban pang serbisyo.

Gi-base_ kining maong programa sa Provincial Ordinance No. 2021-0027 nga usa ka balaodnong gimugna ni Bise Gobernador Rene Relampagos ug gi-aprobahan sa Sangguniang Panlalawigan niadtong Nobyembre 9, 2021.

Ang mga senior citizens nga gusto magpasakop o kaha mo-apil sa maong programa hatagan og Buhat Pasultihon Card nga maoy gamiton sa pagkuha sa libre nga tambal nga naa sa mga ospital nga gidumala ug gipanag-iyahan sa Kagamhanan sa Probinsya sa Bohol.

Para sa dugang updates mahitungod sa mga proyekto ug aktibidad sa Kagamhanang Probinsyal sa Bohol, susiha ang:

Provincial Government of Bohol |Sangguniang Panlalawigan of Bohol | PrIMeR Bohol | Art Yap | Rene Lopez Relampagos