Gipang-apud-apud ni Gobernador Arthur C. Yap kagahapong adlawa ang mga cheke ngadto sa opisyales sa mga barangay sa Segundo Distrito ug sa Lungsod sa Duero.

Midawat ang mga Punong Barangay sa Bien Unido, San Miguel ug Trinidad sa tag 100,000 pesos para sa Waterworks Project. Apil sa natagaan ang mga barangay sa Poblacion (Bien Unido), Puerto San Pedro, Poblacion (San Miguel), Bayongan, Bugang, Camanaga, Cambangay Norte, San Isidro, San Vicente, Sto. Nino, Poblacion (Trinidad), Catoogan, Kinan-oan, Mahagbu, San Vicente ug Soom.

Sa hapon, nakadawat usab ang 21 ka mga barangay sa Duero sa ilang tinuig nga Provincial Aid didto sa Kapitolyo nga nagkantindad ug tag 25,000 ka pesos. Apil sa mga natunolan sa cheke ang mga kapitanes sa barangay Alejawan, Angilan, Anibongan, Bangwalog, Cansuhay, Danao, Duay, Guinsularan, Imelda, Itum, Langkis, Lobogon, Madua Norte, Madua Sur, Mambool, Mawi, Payao, San Antonio, San Isidro, San Pedro ug Taytay.

Sa iyang mensahe, mipa-ambit ang Gobernador sa pinakaulahing taho kabahin sa sitwasyon sa COVID-19 sa Bohol. Gihisgutan niya ang importansya sa pagpa-ubos sa numero sa mga nag-home quarantine diin usa sa mga hinungdan sa pagtaas sa mga aktibong kaso.

Giawhag usab ni Gob. Yap ang mga kapitanes nga kumbinsihon ang mga Senior Citizens nga magpabakuna pinaagi sa pagpasabot kabahin sa bakuna tungod kay base sa datos, ang mga edaran ang kasagarang naapetukhan tungod sa virus.

Kauban niya sa maong pagpanghatag sila Board Members Frans Gelaine Garcia Devenosa, Vierna Mae Boniel, Former Board Member Jaja Jumamoy, Trinidad Mayor Judith Cajes, Duero Mayor Conrada Amparo ug ABC President Edgardo Bagotsay (Taytay, Duero).