DUGANG P2.3 bilyones nga mga proyekto sa pantalan ang mapaabot sa Bohol isip gasa sa administrasyong Duterte, matud ni Department of Transportation (DOTr) Sec. Arthur Tugade.

Apan giklaro usab sa kalihim nga sinaligan sa presidente nga daghan ang proyektong wa unta nahimo ug di mahitabo kon wa pa sila si Gob. Arthur Yap ug Kong. Edgar Chatto, kinsa kanhi gobernador.

Kini gideklarar ni Tugade atol sa pagsubo sa bag-ong Tagbilaran City port passenger terminal building kagahapon.

Ang inagurasyon gitambongan usab nila ni Kong. Aris Aumentado, Kong. Kristine Alexie Tutor ug City Mayor John Geesnell Yap II.

Nakadungog mismo si Aumentado, kansang grupo ug mga gaway sa propaganda sa payola ug social media nagsigeg atake sa gobernador, iyang administrasyon ug kaubanan.

Sinaligan ni Duterte si Tugade kay man of action, buhat ang gipasulti—di ganahag pulitikong maayo lang sa intriga ug tigpatoong limpyo.

Nibutyag ang kalihim sa DOTr nga iyang gipinalisar uban kang Philippine Ports Authority (PPA) General Manager Jay Santiago niadtong Martes ang dugang P2.3 nilyones nga mga proyekto.

Kuyog kang Tugade si Santiago sa pagbisita sa Bohol diin sila giabi-abi usab ni PPA-Bohol Manager James Gantalao.

Padak-an ang cargo area sa Tagbilaran port gamit ang P546 milyones—nga pun-an pa hangtud mahuman—ug ang back-up area ug ro-ro ramp sa pantalan sa Jagna sa laing kantidad.

Ugmaron ug palapdan ang pantalan sa Getafe sa pondong P560 nga matud ni Tugade gipamugos usab kaniya ni Yap.

Dako sab ang gigahin aron kumpletong ayohon ang pantalan sa Catagbacan sa Loon nga apil sa naguba sa kusog nga linog.

Nipasalig ang kalihim nga sama sa iyang gisaad sa paninguha ni Chatto kaniadto, iyang tumanon ang gisigeg pamarayeg ni Yap ug buhaton nila ang gikasabotan para sa kalamboan sa Bohol.

Nanghinaut ang gobernador nga motabang usab ang kalihim sa pagsiguro sa suporta sa presidente aron mapun-an og kusog ang ekonomiya sa Bohol pinaagi sa logistics, food ug transport hub.

Gipasalig ni Tugade ang hingpit nga suporta sa direksyon sa probinsiya ubos ni Yap ug Bise Gob. Rene Relampagos.

Human sa inagurasyon sa port passenger terminal sa syudad, ilang gisugdan sa pagtuki ang maong plano ug damgo.

Si Relampagos girepresentahan sa maong kalihukan ni Bokal Ricky Masamayor ug Bokal Jade Bautista.

Gihulagway ni Tugade si Yap nga usa ka lider nga di mohunong sa pagpamarayeg sa nasudnong kagamhanan alang sa kaayohan sa probinsiya.

Si Chatto hilabihan ka metikuloso nga maoy hinungdang “nakaangkog kinabuhi ug katumanan” ang daghang proyekto sukad sa gobernador pa siya.

Uban usab kang Tugade sa Bohol sila si Kong. Edgar Sarmiento, tsirman sa Komiteba sa Transportasyon sa Kongreso, DOTr Asec. for Procurement and Project Implementation Giovanni Lopez, Asec. for Communications Hope Biliran, ug LTO Regional Director Victor Caindec. (Ven rebo Arigo)